Ca Ciah (by heart) A Huam Lomi Hna Nih I Thim Dingmi Rian Pawl

Ca Ciah (by heart) in A Zoh Huam Lomi Hna Nih I Thim Dingmi Rian Pawl

Nu le Pa nih ka fa tanghra tal cu awn i zuam ko, tanghra na awng ahcun a za ko an in ti bal hna maw? Ka fa ca ciah na huam lotuk zongah degree tal hi cu lak ding in I zuam ko, degree pakhat tal na lak khawh ahcun a za ko tiah an in ti bal hna maw? Degree lak khawh cu a thatuk, a tha lo ka ti bak lo hi. Degree lawng kan lak I thiamnak kan ngeih lo ahcun riantuan tikah kan I hartuk thiamthiam ko. Mah nih huam lomi van tuah hi a har taktak mi a si. Sianginn kai lio ahcun ca ciah ding a si ko, nain by heart in ca kan ciahmi nih thathnemnak a chuakpi tuk lem lo. By heart in ca ciah a huam lomi hna nih kan pawcawmnak caah zei bantuk rian dah kan I thim awk a si.

  1. Hmanthlatu (photographer)
Hmanthlak thiam zong in pawcawm khawh si

Hmanthlak thiam khawhnak dingah degree lak zong a hau lo. Sianginn kai tikah text books chahpipi zong hechat tiin caciah le by heart leng zong a hau lo. Asinain hmanthlak a thiam mi pakhat na si nak ding ah idea le creative na ngei a hau, cu lawng si loin fak piin nai zuam a hau ve. Pakhat na herh vemi cu Camera tools hna kong le light pek ning theory pawl tlawmpal tal cu nacawn ve hrimhrim a hau. Hmanthlak a thiammi na si ahcun minung ah nai chuah hrimhrim ko lai.

  1. Catial Thiam

J.K. Rowling ti mi nu hi fa 3 a ngeimi a si I, cu a fa le a zohkhen pah in coffee dawr ah a to I ca a tial tawn, cu ca a tialmi cu “Harry Potter” series muvi (movie) khi a si I, a tu ahcun mirum taktak ah a chuah cang. Mirang ca le a dang holh na thiam lo zong ah I zuamnak thinlung te na ngeih a si ahcun a hlawh a tlingmi catial thiam na si ko lai. Na lungchung in na ruahmi le na hmuhtonmi hna kha tha tein na tial huam le nai zuam a si ah cun catial thiam minthang na si ko lai. Catial thiam minthang na si ahcun na caah rian a har ti lo.

  1. Video Thlak

Video thlak nak zong in pawcawm khawh a si. Documentary tawimi tete in video thlak hram I thawk law, duhsah huamsam in video tlingtiang in thlak khawh a si. Mah video thlak na thiam khawh nak dingah, video a thlak a thiammi hna sin ah na cawm ve cu a hau. Ka thiam cang keimah tein ka dir ho cang lai na ti tikah, na thiamnak kha mipi sinah phozar khawh si cang ko.

  1. Hmanthlak Suai thiam @Zukthai (Painting)

Hmanthlak suai thiam in pawcawm khawh a si lo tiah a ho hmanh nih an ti kho lo. Hmanthlak suai a thiammi hi an tangka hmuh hna a tha ngai. Hmanthlak pakhat an suai ah hin tangka tam taktak an ngah tawn. Nitlak lei ram hna ahcun hmanthlak an suaimi hi dollar a ting hna in an zuar. Cu tikah hmanthlak a thiammi le minthangmi na si ahcun mirum ah nai cang ko lai.

  1. Bawlung chuih (football player)

Kan hngakchiat lio ahcun, kan nu le ka pa nih bawlung kan chuih tawn ah hin a kan sik lengmang tawn, a ruang cu bawlung chuih thiam in na paw nai cawm lai lo tiah a rak kan ti tawn lengmang. Mah lio chan ahcun a si ve taktakmi thil a si. Asinain tuchan ahcun ramdang chim lo kawlram (Myanmar national League) ah a chuihmi hman hi tangka tam ngai an hmuh cang. Cheuhkhat kawlram bawlung chuih thiam hna cu mawtaw he inn lo thatha he a ummi zong an um len cang. Vanthat ah ramdang club hna ah a chuih kho mi na si ahcun tangka na hmuhmi a tam chinchin ko lai.

  1. Programmer

  Computer programmer a thiammi na si nakding ah nai zuam ve a hau. Facebook a tuahtu Zuckerberg zong a hawi le he inn khan a hme mi pakhat chungah coding an tial, programmer an suai lengmang I, tu ahcun mirum taktak ah ai chuah ko. Facebook a hmang mi hmanh hi 2000 million renglo kan si cang. Biakil: Degree lak lo zong i zuam duhnak thinlung kan ngei ahcun minung ah kan i chuah ko lai. Cheukhat caah cun Sianginn kai i degree lak khawh hi a har ngai, a ruang tampi ruang zongah a si kho, sianginn kai i degree lak cu a tha lo ka ti bak lo, a thatukmi a si. Asinain degree lak tiang a kai kho ve lomi hna nih kan pawcawmnak caah zeibantuk hi dah kan tuah lai. Zeithil paoh hi a fawimi thil a um lo, cu a fawi lomi thil cu kanmah nih zuamduhnak thinlung kan ngei a hau. Thil pakhat pakhat kan tuahmi cungah, teima tein le fakpi in kan I zuam ahcun 100 chung 100 hlawhtlingnak kan va hmuh lo hmanh ah, 100 ah 90 hi cu hlawhtlinnak kan hmu hrim lai. Vawlei cung billionaire a si mi Facebook sertu Mark Zuckerberg, Apple company a tuah tu Steve Jobs, Microsoft a tuah tu Bill Gates hna zong university chuak lak in a kaimi an si lo. Asinain an tuahmi thil cungah fakpi in zuamnak an ngei i hlawhtlingnak an hmu ko. Sianginn kan kai tikah Ca by heart kan I hartuk zongah kan lungdong hlahseh, lungsau le thinfual tein kan zoh ceomo ahcun, nikhat khat ahcun thiamnak a ngeimi kan si hrimhrim ko lai. Zeibantuk thil kan tuah paoh ah zuam duhnak thinlung rak ngei hi a biapi cemmi a si ko. Credit:Duwun

Be the first to comment

Leave a Reply

Your email address will not be published.


*