Hawikom Tha Chizawh Le Vok Tuanbia

Hawikom Tha Chizawh Le Vok Kong

Hlan ah Chizawh le vok an um i, pakhat le pakhat ai dawt taktak mi asi.

Nikhat cu Chizawh le Vok cu lam an leng i, ruah lo pi in Ram vaipa nih rap a tuahmi khur chungah Chizawh kha ruahlo pi in a tla diam ti si. Cu tikah chizawh te nih khur thukpi chung cun zeitin dah ka chuah khawh hnga tiah hecah tiah ai zuam len, asinain khur chung in a chuak kho hrimhrim lo.

Cu tikah Vok nih hri a sau ngaingai mi pakhat a va kawl, hri a hmuh tikah chizawh te a tlaknak khur ah cun a ra i, Chizawh te nih khur chungin ka chuak kho cang lai tiah ai nuam tuk. Chizawh nih vok cu hri kha van thlak law ka rak kai lai tiah a ti. Cu tikah Vok nih hri cu a dih lak in khur chungah a hei thlak.

Chizawh nih ka chuak kho cang lai tiah ai ruah mi cu thiset cungah thlet mi ti bantuk ah ai cang diam. cu tikah chizawh nih thinhang ngai in Vok cu “mah bantuk in hri na thlak ahcun zeitin dah ka kai khawh lai” tiah a hei ti.

Cu tikah vok nih cun chizawh cu zeitin dah ka tuah kun lai tiah a hei hal i Chizawh nih a leh mi cu “hri a par pakhat kha na tlai lai i, a dang a par pakhat kha khur chungah na thlak la, khur chungah a tla mi hri par kha kai tlaih lai i, a cungah nangmah nih na tlaih mi hri khan na ka dawh lai cu” tiah a hei ti.

Cu tikah vikvak tiah Vok cu khur chungah a zuang i Hri cu a hei char i “Kha zeitin dah ka tuah lai chim” tiah a hei ti. Chizawh cu zei chim awk hngal lo in a tah hna chuak pah. Asinain vok nih a cungah a ngei mi lungput a hmuh tikah ai nuamh tuk nak ah a mitthli tlak pah in vok cu a hei kuh.

Mah tuanbia nih a chim duh mi cu “cheukhat minung cu theihhngalhnak, fimnak le thilti khawhnak an ngei lo, asinain mah bantuk minung hna nih na nun chung na pawngah dirpi in “chiatni na ton ah siseh, thatni na ton ah siseh, harnak na ton ah siseh, lomhnak na ton ah siseh” a zungzal in hmunkhat ah an umpi pengtu kha an si ti mi fim a kan chimtu tuanbia asi.

 

 

Be the first to comment

Leave a Reply

Your email address will not be published.


*